Kodi Penal Viti 2014 KREU V DËNIMET Neni 29 Dënimet kryesore (Ndryshuar me ligjin nr.8733, datë 24.1.2001, neni 79; shtuar paragrafi i fundit me ligjin nr.9086, datë 19.6.2003, neni 2; shfuqizuar paragrafi i fundit me vendimin e Gjykatës Kushtetuese nr.47, datë 26.7.2012) Për personat që kanë kryer krime jepen këto dënime kryesore: 1. Me burgim të përjetshëm 2. Me burgim 3. Me gjobë Për personat që kanë kryer kundërvajtje penale jepen këto dënime kryesore: 1. Me burgim 2. Me gjobë Neni 30 Dënime plotësuese (Ndryshuar pika 2, me ligjin nr.9086, datë 19.6.2003, neni 3; ndryshuar pika 1 me ligjin nr.9275, date 16.9.2004, neni 3; shtuar pika 10 me ligjin nr.23/2012, datë 1.3.2012, neni 6) Për personat që kanë kryer krime ose kundërvajtje penale, bashkë me dënimin kryesor, mund të jepen edhe një ose disa nga këto dënime plotësuese: 1. Ndalimi i të drejtës për të ushtruar funksione publike. 2. Konfiskimi i mjeteve të kryerjes së veprës penale dhe produkteve të veprës penale. 3. Ndalimi për të drejtuar automjete. 4. Heqja e dekoratave, titujve të nderit. 5. Heqja e së drejtës të ushtrimit të një veprimtarie ose mjeshtërie. 6. Heqja e së drejtës për të ushtruar detyra drejtuese pranë personave juridikë. 7. Ndalimi për të qëndruar në një ose disa njësi administrative. 8. Nxjerrja jashtë territorit. 9. Detyrimi për publikimin e vendimit gjyqësor. 10. Humbja e përgjegjësisë prindërore. Gjykata, në raste të veçanta, kur dhënia e dënimeve kryesore çmohet e papërshtatshme dhe kur ligji parashikon dënim me burgim deri në 3 vjet ose dënime të tjera më të lehta për veprën e kryer, mund të mjaftohet vetëm me caktimin e dënimit plotësues. Neni 31 Dënimi me burgim të përjetshëm (Ndryshuar paragrafi i I, II dhe titulli me ligjin nr.8733, datë 24.1.2001, neni 79; shfuqizuar paragrafi i fundit me ligjin nr.9686, datë 26.2.2007, neni 5) Dënimi me burgim të përjetshëm jepet me vendim të gjykatës për kryerjen e një krimi të rëndë. Dënimi me burgim të përjetshëm nuk jepet ndaj personave që në kohën e kryerjes së krimit nuk kanë mbushur moshën tetëmbëdhjetë vjeç, si dhe për gratë. Faqe|15